یک هیأت بلندرتبه سیاسی به رهبری داکتر عبدالله عبدالله، رییس شورای عالی مصالحه ملی برای اشتراک در نشست مسکو به روسیه سفر می‌کند.
دفتر شورای عالی مصالحه ملی می‌گوید فردا(چهارشنبه، 27 حوت 1399 خورشیدی) یک هیأت سیاسی به رهبری آقای عبدالله به روسیه سفر می‌کند تا در نشست مسکو که مرتبط به صلح افغانستان دایر می‌شود، اشتراک ورزند.
فریدون خزون، سخنگوی شورای عالی مصالحه ملی هدف اساسی برگزاری این نشست را «تسریع روند صلح» گفته است.
هیأت دولت تحت مدیریت شورای عالی مصالحه ملی در این نشست شرکت می‌کنند.
قرار است چهره‌های سیاسی، شامل اعضای ارشد حکومت، اعضای ارشد شورای عالی مصالحه ملی، رهبران و برخی از نمایندگان احزاب سیاسی در نشست مسکو اشتراک ورزند.
در فهرستی که تاکنون همگانی شده فقط یک زن حضور دارد. داکتر حبیبه سرابی، عضو هیأت مذاکره کننده دولت با گروه طالبان در جمع هیأت 16 نفره‌ای خواهد بود که فردا به مسکو می‌رود.
- عبدالله عبدالله، رییس شورای عالی مصالحه ملی
- میررحمان رحمانی، رییس مجلس نمایندگان
- حامد کرزی، رییس جمهوری پیشین کشور
- مارشال عبدالرشید دوستم، معاون پیشین رییس جمهوری
- محمدکریم خلیلی، معاون پیشین رییس جمهوری و رهبر حزب وحدت اسلامی افغانستان
- گلبدین حکمتیار، رهبر حزب اسلامی افغانستان
- بابر فرهمند، معاون شورای عالی مصالحه ملی
- سید سعادت منصور نادری، وزیر دولت در امور صلح
- محمد معصوم استانکزی، رییس هیأت مذاکره‌کننده دولت
- متین بیگ، عضو هیأتمذاکره‌کننده دولت
- احمدنادر نادری، عضو هیأتمذاکره‌کننده دولت
- داکتر حبیبه سرابی، عضو هیأت مذاکره‌کننده دولت
- محمدعلم ایزدیار، نایب اول مجلس سنا
- عبدالله خنجانی، معین وزارت دولت در امور صلح
- عبدالستار خواصی، نماینده حزب اسلامی افغانستان
- . غیرت بهیر، نماینده حزب اسلامی افغانستان
قرار است نشست مسکو روز پنج‌شنبه، 28 حوت برگزار شود. قرار است زلمی خلیل‌زاد، نماینده خاص امریکا در امور صلح افغانستان و یک هیأت ده نفری گروه طالبان به رهبری ملا عبدالغنی برادر، معاون سیاسی و رییس دفتر طالبان در قطر نیز شرکت کنند.
